ФИФА IShowSpeed-ке қатысты нәсілшілдік ісін тексеруде
Аргентина мен Кабо-Верде матчында америкалық блогер IShowSpeed нәсілшілдік қорлауға тап болды деген айып бойынша ФИФА тергеу бастады.
ФИФА америкалық танымал блогер IShowSpeed-ке қатысты нәсілшілдік қорлау болды деген айып бойынша ресми тергеу бастады. Оқиға жұма күні өткен Аргентина мен Кабо-Верде арасындағы достық матчта орын алды. Кездесу үй иелерінің пайдасына 3:2 есебімен аяқталды.
BBC Football хабарлауынша, инцидент блогер мен жанкүйерлердің бірінің арасында болған деп мәлімделеді. Дәл осы эпизодтан кейін нәсілшілдік сипатты қорлау туралы шағымдар түсіп, футболдың басты ұйымы жағдайды тексеруге кірісті.
IShowSpeed — әлемдегі ең танымал блогерлердің бірі. Оның футболға деген қызығушылығы бұған дейін де талай рет назарға ілініп, ол ірі матчтарды жиі тамашалайтын.
ФИФА нәсілшілдік пен кемсітушіліктің кез келген түріне қарсы қатаң саясат ұстанады. Тергеу нәтижесі анықталған соң ұйым тарапынан ресми шешім жарияланатын болады.