Невилл: Гвардиоланы алмастыру — Мареска үшін ең ауыр сын
Гари Невилл Энцо Мареска Манчестер Ситиде Пеп Гвардиоланы алмастыруды клуб тарихындағы ең ауыр сынақ деп атады. Себебі команда тек жеңіспен ғана санасады.
Англияның белгілі сарапшысы әрі бұрынғы қорғаушысы Гари Невилл Энцо Мареска үшін Манчестер Ситиде Пеп Гвардиоланы алмастыру оңай болмайтынын айтты. Sky Sports Football хабарлағандай, ол итальяндық бапкердің алдағы жұмысын «ең ауыр сын» деп бағалады.
Невилльдің сөзінше, мұндай мәртебелі клубта басты қиындық — нәтижеге қойылатын талаптың жоғары болуы. Манчестер Ситиде жеңістен бөлек ешнәрсеге орын жоқ.
«Бұл — ең ауыр сынақ. Себебі клуб жеңістен басқа ешнәрсемен санаспайды», — деді сарапшы.
Гвардиола Манчестер Ситиде ұзақ жылдар бойы үстемдік құрды. Каталондық маман басшылығымен команда АПЛ-да бірнеше рет чемпион атанып, Чемпиондар лигасын да бағындырды. Сол себепті оның мұрагеріне қойылатын талап ерекше биік.
Мареска үшін бұл — мансабындағы ең үлкен сынақтардың бірі. Жанкүйерлер де, клуб басшылығы да жаңа бапкерден тек жеңіс күтеді.