Ван дер Варт жапондықтарға нәсілшілдік үшін кешірім сұрады

Нидерландының бұрынғы ортаңғы ойыншысы, «Тоттенхэмнің» экс-жұлдызы Рафаэль ван дер Варт ауыр жағдайға тап болды. Ол Нидерланды мен Жапония арасындағы 2:2 есебімен аяқталған матчты талдау барысында жапон ойыншылары туралы нәсілшілдік реңктегі сөз айтты.

Ван дер Варт эфирде жапондықтардың «бәрі бірдей көрінеді» деп пікір білдірді. Бұл сөз бірден үлкен наразылық тудырды. Әлеуметтік желілерде сын толқыны көтеріліп, нәсілшілдікке қарсы ұйымдар да үн қосты.

Скандал тез тарағаннан кейін ван дер Варт ресми түрде кешірім сұрады. Ол өз сөздерінің орынсыз болғанын мойындап, Жапония командасы мен барлық жапон жанкүйерлерінен кешірім өтінді. Бұрынғы футболшының мансабы бойынша мұндай даулы жағдай бірінші рет туындап отыр.

Ван дер Варт «Реал Мадрид», «Гамбург» және «Тоттенхэм» клубтарында ойнаған атақты футболшы. Қазір ол телевизиялық сарапшы ретінде белсенді жұмыс істейді. Алайда бұл оқиға оның беделіне айтарлықтай нұқсан келтірді.